Op zaoterdigmiddig 27 jannewarie waerdj weer de Jeugdboôntjemiddig georganiseerdj!

 

De jeugd boôntje middig is unne middig dae al jaore speciaal veur de jeugd van Swartbrook waerdj georganizeerdj. De jeugd kan zellef keeze wat ze gaer aan os wille laote zeen op de bühne. Dit kan un sjoeën tonieëlstukske zeen, mer zeker ouch un zang of dans optraeje. Un optraeje wat wae al jaore zeen trök koome op ozze jeugd boôntje middig is de Dancing Kids onger leiding van Aniek van Bommel.

Dit jaor heeft de JBM kemissie zien beste beintje veurgezat om zoeë völ meugelik jeugd enthousiast te maake veur de Jeugdboôntjemiddig. In december hebbe wae unne middig mét geïnteresseerdje jeugd, en aojers, saame gezaete om allerlei opties (sketches, dansjes, meziek, etc.) te bespraeke. Wae zeen bleej om te kinne zégge det wae heejdoor weer unne sjoeëne, volle Jeugdboôntjemiddig kinne organiseere!

 

De middig begintj om 13:00u mét ut veurstille van Jeugdpreens Gijs mét zien jeugdraod. Omdet deze middig waerdj georganiseerdj veur de jeugd van Swartbrook moôge we ozze jeugdpreens neteurlik neet vergaete. Daorom hebbe wae in de pauze, van 14:30u tot 15:15u, un jeugdprinseresepsie woeëdet ozze jeugdpreens gefelisiteerdj kan waere. Tegeliekertiêd kan de jeugdpreens de jeugd ongersjeî-je die nog gein óngersjeî-jing hebbe. Wae verwachte rondj 16:30u deze middig aaf te sloeëte. 

Ouch dit jaor waertj de presentasie weer gedaon door Lieke van Bommel, Joeri Gielen en Marco Beckers.

Zeen wae jullie dan!?