Ut begin
De vereiniging: vastelaovundjs-vereiniging De Spoeëkejaegers
Ut ontstaon van de Spoeëkejaegers is te danke aan ut aojercomité vanne sjool, die op 22 jannewarie 1970 ein beejeinkomst organiseerde mét as doel wat mieër structuur in de vastelaovundjs-veering in Swartbrook te kriege, mét as resultaat det de hieëre Walt Knippenberg en Silvester Vossen ut initiatief nome om ein vastelaovundjsvereiniging op te richte.
Op 29 jannewarie 1970 woort d’er ein vergadering mét de minse oet ut dörp belagtj en de oprichting van ein vastelaovundjsvereiniging waas al snel ein feit. Oet de aanwezige inwoeëners woort de ieërste raod van elf gevormtj. Det woore:
W. Knippenberg P. Geelen M. Derkx
G. Rademakers H. Nouwen M. Evers
J. Brouwers P. Corsten J. Stultiens
S. Vossen P. Crins C. Prinsen
F. v.d. Feesten J. Derkx H. Evers
De kleier waerdje gekocht van gelieëntj geldj en de Moerebuuk oet Ell waerdje benadertj om te helpe beej ut organisere van de vastelaovundj in Swartbrook. Dit waerdje towgezagtj door den Hieër Wiel Beurskens, dae kreeg hiej veur de ieërste ongersjeiding oetgereiktj door Waltje. De middestandj oet Swartbrook steundje auch, zoeëdet de start hieël vlot ging.
In 1981 veerdje de Spoeëkejaegers nog ut 11 jaorig bestaon as vastelaovundjsvereiniging, mer daonao woort ut steeds meujliker veur de vereiniging om in Swartbrook eine prins te vînge en oet te rope en ut ledeaantal op peil te haoje. Nao un tiêdje (ein jaor) kwakkele kwoom de omslaag in 1983 toen un aantal Swartbrookenare, die mét lede ouge aanzoge wi-j de club in versukkeling raakdje, un beejeinkomst belagdje in café De Krang. D’er woort beslote det ut anges most en ouch kos, D’er woort un nowwe start gemaaktj en vanaaf dae tiêd is de club herreze en tot noow toe springlaevendj.
Beej de keûs van de naam veur de vastelaovundjsvereiniging speult ein plaatselike legende ein euverheersendje rol. Swartbrook liktj dichtbeej ut netuurgebied ‘De Krang” en de omliggendje bosse rondtjom Swartbrook woorte vreuger ut spoeëkebos geneumtj, woeë snachs spoeëke rondj dwaaldje. De legende verteldj det veural in de wintjer in en rondjom ut bos mysterieuze dinger gebeurdje.
Vanaaf 11 november mot men good oppasse as men tiedes un nachtelik rundje door “De Krang” wanjjelt. De spoeëke in ut bos hebbe gein slechte bedoelinge. Ut motte dus waal fieëstspoeëke zeen, want eeder jaor kumtj d’er minstens ein spoeëk zich tösse ut vastelaovundjveerendj Swartbrook minge. Traditioneel weurtj op vastelaovundj-dinsdig eemes as spoeëk verkleitj, gevange door de prins en onger begeleiding van de boorekepel en alle Spoeëkejaegers trök ut bos in gejaagtj.
V.V. De SpoeëkeJaegers opgerigtj 29-1-1970
(Opgegraave en opgeteikentj oet de notule)
