Prinsebal
11 jannewarie 2025
Zaoterdig 11 jannewarie. We opene deze aovundj om 20:11u beej os Spoeëkejaegersmonument op ut kerkplein, woeë we 'Ut Spoeëk' zulle verwelkoome oet de Krang. Daonao zulle we ozze fieëstaovundj voort zette in ut Spoeëkepeliês (de Corneel) mit un tal van onthullinge.
We zulle deze aovundj:
- ozze noowe prinsegallereej presenteere
- de jeugdprins en jeugdprinses veurstelle
- ut booregezelschap oetroope
- de jubilarisse huldigen:
Marjo Meuwissen (3x11), Lei Nouwen (3x11), Eric van den Schoor (1x11) en Wiel Douven (1x11)
- de hooghede van 2025 oetroope
Dj Sander Stienen zal de muziek dreije om de vastelaovundjstumming dr in te bringe. Veur diegene die ut nog neet gepreufdj hebbe, aug os Spoeëkepilske 'Mistig Wit' zal deze aovundj te verkrieëge zeen!
We hebbe de aovundj geoopendj beej os monument. Dao waas ut de taak aan de Spoeëkejaegerkes en Spoeëkejaegerinnekes om ut spoeëk oet ut Krangerbos te haale. Naodet de jeugd ut spoeëk haaj gevange, mochten jeugdprins Keano en jeugdprinses Zoë saame mit ut spoeëk beej ut monument de Spoeëkejaegersvlag heise. Onger un stukske meziek van de Spoeëkejaegerskapel ging eederein in polonais teruk nao ut Spoeëkepeliês.
Op de bühne in ut Spoeëkepeliês nomen jeugdprins Keano en jeugdprinses Zoë de kans om zig, mét ut oplaeze vanne proklemasie, aan de rest van ut dörp veur te stille. Dit ging herstikke good! Op de Jeugd Boôntje Middig en op de Boôntje Aovundj zulle Keano en Zoë dit nog ins laote huuere.
Ouch mocht os jeugdprinsepaar hun medalie presentere en al inkele minse ongersjeije woeëonger de jeugdraod, aojes en anger gezinsleeje.
Veurzitter Lars en vorst Mark maakdje heejnao plaats op de bühne om de jubilarisse van 2025 te huldige. Dit zeen:
- Marjo Meuwissen (3x11)
- Lei Nouwen (3x11)
- Eric van den Schoor (1x11)
- Wiel Douven (1x11)
Efkes later waas de aandacht van eederein gerichtj op de beamer. Dao speuldje zich un filmke aaf (klik heej veur de link) woeë op waas te zeen wie ozze boôrebroêdegom op unne doeëdgewoeëne zunjigmiddig zien bruudje vonj op ut graasveldj en op zien knieën ging om heur ten huwelik te vraoge.
BOÔREBROÊDSPAAR 2025: JOOST WANDERS & KIM GIELEN
Op de bühne mochte Joost en Kim ouch hun femilie en getuûge nao veure roope:
Joost zien aojers Peter Heijnen en Jolanda, en getuûge Gerrit Kemper.
Kim heur aojers Patrick en Ellen Smeets, en getuûe Aniek van Bommel.
Dit boôregezelsjap nuuedigtj eederein van herte oet op de groeëte daag: vastelaovundjszaoterdig 1 mieërt in ut Spoeëkepeliês.
En om 11 minuute op 22.00u waas ut zoeëver, de oetrooping van ozze prins 2025:
PRINS DANNY de 1e (Jetten)
Mét zien ADJUDANTE MARTIJN (Ogier) EN PIETER-BAS (Litjens)
Dit gezelsjap woort snel de mantels omgedaon, de staek mit vaere opgezatte, en de septer gegaeve. Daonao mocht groeëte prins Danny zich veurstille aan de rest van ut dörp middels zien proklemasie. Ouch Danny mocht heejnao al inkele minse ongersjeije.
Mét un polonaise, mét kersverse prins Danny veurop, vervolgdje dit drukbezochtje prinsebal!
Het waas unne aovundj met völ onthullinge. Allerieërst vonj de presentatie van ozze noowe prinsegallereej plaats! Komtj ut alle bekieke in os Spoeëkepelies: ein euverzicht van 5x11 jaor aan Prinse én jeugdprinsepaare.
