Spoeëkejaegers Lotereej
Om de vereîniging financieel waat draagkrachtiger te maake, woort in 1983 besloôte om ein lotereej te organisere. De vergunning waerdje aangevraogdj beej de Gemeindje. De inwoeëners van Swartbrook waerdje ingelichtj euver dees Unieke Spoeëkejaegers-lotereej. Men kos ein loot koûpe veur 50,-- göldje welke dan ein hieël jaor geldjig is en elke léste vriêdig vanne maondj waas d’r ein trékking mét versjillendje geldjpriêze.
De trékkking gebeurdje via ein “blaos-mesjien”. Dit mesjien is gemaaktj door de hieëre Toeën Teunissen en Cor Princen. In dit blaosmesjien waere alle genummerdje ballen, net zoveul balle as verkochdje lote, in gegoeist, ut mesjien husselt de ballen doorein en via ein gaetje valtj d’r ein belke in ut glaas en det levertj dan eine priës op.
Vreuger vonje de trékkinge altiêd plaats in de kefees van ut dörp, elke maondj ging men dan mét ut mesjien euver straot van de eine kefee nao de angere.
Later gebeurdje dit allein nog mer in kefee beej Dirke. Vanaaf det de MFA d'r is, met ieërst kefee Plexat en nôw kefee Bi-j Sanne, waerdj de trékking allein dao gehaoje.
Vanaaf ut begin regeldje ut bestuur de trékking, det waas o.a. Sjaak van de Moeësdieëk, Harrie Coolen en Sjaak van Luc (Derckx). Moosje deet ut meiste werk, hae sjreef de lote.
Later kwaam Johan van Bommel d’r beej i.p.v. Jac van Luc.
Nao 23 jaor is in 2005 ouch Moosje d’r mét gestoptj en heet Peter Gielen zien take euvergenoome.
Tegenwoordig kostj ein loot 25,-- Euro.
Now weurtj ouch elke kieër aan de winnaar van de ieërste priês gevraogdj of d’r de volgendje kieër de trékking wiltj doon. De minse kinne dan zelf zeen wie ut in zien werk geit. Det vinje ze hieël fein en weurtj zeer gewaardeertj.
Gestéltj kan waere det dees lotereej ein grandioos sukses is gewore gezeen ut aantal verkochdje lote.
De lotereej-kemissie besteit now oet Peter Gielen, Johan van Bommel en Ger Smolenaers.
Heej zeet gae ein van de makers van ut Blaosmesjien, Cor Princen in kefee Bi-j Sanne. I.v.m. zien 90ste verjaordaag deed hae in mei 2023 de trékking.
Heej is Sjaak van de Moeësdieëk aan ut werk in kefee Beej Dirke, mét naeve zich een jong toesjouwer, Veerle Smolenaers.
Op dees foto is “notaris” Peter Gielen de enveloppe mét ut priêzegeldj aan ut sjriieve en Johan van Bommel verzörgtj de balle, auch in kefee Beej Dirke.
Vastelaovundj, bringe wae beej uch thoes.
In de corona tieed hebbe we veur alle minse d.m.v. un filmke oetgelagtj wie wae de trèkking doon en wie wae beej de minse langs gaon om de hoofdprieës te euverhandige.
Oetreiking van de 1e priês in de spoeëkejaegers-lotereej door Gaston
De Spoeëkejaegers Lotereej
