Proklemasie van Prins Gerrit de 1e van de Spoeëkejaegers

​

​

Beste Spoeëkejaegers en Spoeëkejaegerinnen,

​

​

Ich, Prins Gerrit den Ieërste,

​

Geboôre op de Breybaan als zoon van Gerard van Rommelboor Henk van wae gaon der met de Camper op oet en Tante Dien van ich haaj ut op dae Kemper gemuntj en Inge van Piet van de gevûldje tandj en Lidy die van gein Wieëke wist.

 

Ich woeën samen met Eefke van Ton, de Witte van Klusse Lei en Netje van Juûste en van Marijke van de Boomerang femilie van Drees van Koeëbes Säk en Drina van Broeëds Koeëb.

 

Samen hebbe wae nog gein wichter, mèr wae haoje allebei van “gamen” en det samen speulen bevältj os waal!

 

Wae woeëne op Polderte in ut aoje hoeës van jubileumpreens Martijn. Wae motte good oplette det wae os neet verhaspele met ut devies, want ut aoje devies van Martijn steit nog boven ut bèd oppe moor gesjreêve!

 

Wae doon uch weten dèt:

 

Ten ieërste: Wae hebben alletwieë gestudeerdj en zeen dus echte “bollebozen”. Ich heb de bolle kop en Eefke is waal es boos op mich als ich eure naam weer verkieërd heb gesjreêve.

 

Ten twieëdje: Pap en Mam woore Prinsenpaar in 1995 en in de bolle boeëk van os Mam heb ich ut Prinsensjap met de paplaepel ingegaeve gekrege.

 

Ten derdje; Ich heb dit jaor un echte stand-in. Det is mien twieëlingbroor Pieter. Als ut mich te heit onger de veut weurdj dan sjakel ich um in!

 

Ten veerdje: In ut dageliks laeve bin ich dataspecialist in de oet-vaart verzörging, mèr deze vastelaovundj gaon ich der veur zörgen det wae de vaart der-in haoje!

 

Ten vieëfdje: Bee-j ut voetballe heb ich un ernstige knieblessure opgelaupe en daorom bin ich coach gewoore van RKSVV 2. Die motten mich noeë helpen met hosse en springen, mer dét zal waal lukken want die doon neet angers!

 

Ten zesdje: Vreuger heb ich bee-j ut kuûrke gezaete en noeë wil ich gaer un Vastelaovundjsnummerke maken. Wie de Vorst dèt huûrdje zagt der gelieëk : “Weem neet!”

 

Ten zevendje: Ich bin un échte student. Ich heb acht jaor gestudeerdj en gaon weer terûk de sjoolbanken in. Der kan nog waal get bee-j in dae bolle kop!

 

Ten achtste: Mien Prinses Eefke werktj bee-j IVN natuureducatie en duit van alles met communicatie en vormgaeving. Dèt zal bee-j de Raod nog neet mètvallen!

 

Ten neugendje: Ich kook gaer, mèr Eefke neet. Die kooktj allein van gif als ich weer es un aovundj laat thoeës kom van de voetbalclub.

 

Ten tieëndje: Ich heb gein greune vingers want de hoof is bee-j os hieëlmaol verwilderdj. Mèr os pap zagt dèt ut neet erg is want dèt is hieël biologisch!

 

Ten elfdje; Det der mer twieë dingen op mien beerviltje mogen staon; un kaod pilske en de opstelling van ut twieëdje en daorom heb ich de orde van ut ''beklâdj beerviltje'' ingesteldj en gaon ich noeë in de Vastelaovundj veurop onger mien devies:

​

​

“Noeë effe geine coach langs de lien,

wae gaon aan ut beer en de vröllie aan de wien”

​

Alaaf!

​