Proklemasie van Prinses Aniek 1e van de Spoeëkejaegers

​

​

Beste Spoeëkejaegers en Spoeëkejaegerinnen,

​

Ich, Prinses Aniek den ieërste,

​

Geboôre oppe Coolestraot, naeve de aoj café van Broer van Dirke, as dochter van Johan van Har van Henne Tinus en Netje van Bloôme en Marga van Jeûke Sjaak en Corrie van Böskes. Al zeen Toos en Pierre Beelen ouch van groeëte waerde gewaesj veur mien Spoeëkejaegersblood. Mien adjudante koome trouwens van dezelfdje Jeûke stambaum aaf.

Verder heb ich nog ein groeëte zus, Lieke, die net als mich de 1 maeter 60 neet gehaaldj heet.

Ich doon uch weete det:

Ten ieërste: Ich werk op Bosseve als pedagogisch professional en draag dao zörg veur de allerkleinste. Ich bin dus neet vies van ein bitje zeiver. Det zoej mèt dees daag nog waal ins van pas kinne koome.

Ten twieëdje: In ut dörp bin ich bekindj als ‘juf Aniek’, ich bin namelijk de trotse dansjuf van de Dancing Kids. Dao zörg ich det ze eedere zaoterdigmörge flink meug zeen van ut danse, lache én ut zanikke. Det danse kinne ze dan mèt de vastelaovendj laote kieke.

Ten derdje: Ich bin al jaore leiding beej KVW. Ich lieër ze veural liedjes zinge en fleenk kaake, zeker als we in de bös zitte. Ut kwoom al zoeë wiêt det de horloge van Bart Baens in de bös aangoof det ut omgaevingsgeluid gehuuërverlees kos veroorzaake. Dus als die wichter neet kinne loestere.. liktj det toch ein bitje aan mich

Ten veerdje: Ich bin gaer creatief bezig. Knutsele, filme, verve, klusse, met ’t neijmesjien aane gang, ich ving ut allemaol sjiek om te doon. Det beteikentj waal det d’r beej os oppe kamertaofel meistal ein stök of 5 projecte ligge, die ich nog aaf mot maake, als ich tössedoor unne kieër tiêd heb. Dao heet trouwes neemes last van, want os mam heet heur projecte oppe zölder en os pap oppe zaak

 

Ten viêfdje: Stilzitte is niks veur mich, mer stil zeen ouch neet. Gelökkig meuje zich mieër minse mèt dees proclematie, want angers waasj neet beej 11 peuntje gebleeve bin ich bang.

Ten zèsje: Ich heb versjillendje jaore beej de dames van RKSVV gevoetbaldj, en stong dao op positie links boete aom. Noow kriegse mich fanatiek beej ein spelletje 30 Seconds, want dao in bin ich wáál snel.

Ten zevendje: Veur frietjes moogse mich wakker maake, mer alse met kieës aan keums, zèt ich dich boete. Zoals os pap altiêd zeet: Kieës, dao kriegse wratte van oppe rök. Ich waog mich trouwes ouch neet aan ein glaas beer, dus gae zöltj dit sezoen toch echt zellef de vaate leeg motte kriêge.

Ten achste: Ich veul mich unne echte spoeëkejaeger. Os pap waas adjudant van Prins Henrie in 1997 en 9 maondj later bin ich geboôre. Det kan geine toeval zeen. Detzelfdje geldj trouwes veur mien adjudant Kim, heur pap Peter waas in det jaor namelik ouch adjudant, en ouch Kim is nog in 1997 geboôre.

Ten neugendje: Wie ich 4 maondj aod waas, deej ich al mèt aan de groeëte optocht van Swartbrook, vanaaf 3 jaor waas de wichter boontje middig vaste prik en noow doon ich al jaore mèt aan de Boôntje aovundj. Al bin ich dao in gein oetzondering, want de rest van ’t gezin ging mich al veur.

Ten tieëndje: Ich zit in de jeugdcommissie van De Spoeëkejaegers, al heb ich mètgemaaktj det ein anger vereiniging dacht det ich beej de jeugdraod huuërdje en neet beej de begeleiding. De jeugdraod gruûdj mich toch al boôve de kop oet. Gelökkig veul ich mich naeve Jeugdprins Dex wat mieër op mien gemaak!

Ten ellefdje: Ich ving ut ein groeëte ieër det ich als ieërste prinses vanne Spoeëkejaegers veurop moog gaon. Ich kos neet wachte tot eemes miene prins zoej wille waere, al zal dees prinses ouch allein hur menke waal staon. Ein veurdeil veur mien adjudante: ze hoove gein vaere mèt te pakke!

Ich heb de Orde van ’T vastelaoveshert’ ingesteldj en gaon uch veur onger mien devies:

‘’Raod, dames, jeugd laotj gaon, kepèl gaef ein concert.

Maak heej saame ein groeët fieëst, dan sleit mien vastelaoveshert’’

Alaaf!