Proklemasie van Prins Danny 1e van de Spoeëkejaegers

​

​

Beste Spoeëkejaegers en Spoeëkejaegerinnen,

 

Ich, Prins Danny den Ieërste,

 

Geboôre op de Bertiliastraot as zoon van Peter van de p-lies en gaef um van Jetje en Ria van Pie van Janus de Bekker en Jes van Bel van Laentje

 

Ich heb twieë groeëte breurs Pedro en Mario. Dèt zeen Spaanse name, mér os pap waas geine Sinterklaos en heet mich Danny geneumdj. As zoon van unne p-lies steit ut Spoeëkejaegers-blaw mich herstikke good en bin ich streng mèr rechtvaardig!

 

Ich woeën samen met Lisa Beej Polderte, un echte Prinsenbuurt. Det kins ze waal zeen aan die kaste van hoeëze die dao staon! En mét mien klein prinsesje geneet ich dao van ut oetzicht op de Leukerbeek onger ut motto: “Leuker kan ut neet waere, maar waal mekkelukker”!

 

Ich doon uch weten dèt:

 

Ten ieërste: Vreuger woeëj ich gaer bekker of kok waere, mèr ich heb der hieëlemaol niks van gebakke! Daorom bin ich mer accountant gewoore; Dao haaj neemes op geraekendj!

 

Ten twieëdje: Ich bin samen met miene compagnon de baas van N-XT advies. Dét is un accountantskantoeër woeë wae os de vingers blaw houwe op ut raekenmesjienke. Daodoor betale de minse zoeë min meugelik belasting. Det is hieël get angers as Peter Gielen!

 

Ten derdje; Ich doon gaer spelkes met mien dochter Lisa. Mèr met memory verlees ich meistal, ich heb un geheuge as un zeef! ……Woeërom staon ich hieëj eigeluk?

 

Ten veerdje: Ich bewaak mien grenze good. Daorom bin ich grensrechter beej RKSVV. Dét heb ich gelieërdj van Liba, dae waas meistal ouch neet snel genôgt om boetespel te zeen. Ich huûr ut hum nog zegge; “Jao, jao jong, de pûntje dao geit ut om!”

 

Ten vieëfdje: Ich bin al jaore leider beej KVW. Nao de Vlaamse kermis kom ich meistal van un kaoje kermis thoeës as ich weer wat te völ op heb.

 

Ten zesdje: Ich drink gaer un good glaas beer en heb dit jaor ut Mistig Wit van de Spoeëkejaegers gebrouwe. Dèt heb ich gewete wie-j ich beej Ger en Ellie in de slaopkamer stong. Mèr ich waas zoeë weer nuûgter wie-j ich Ger huûrdje rônke!

 

Ten zevendje: Ich gaon gaer touren met miene oldtimer. Ich kan der mer gein aafscheid van neme. Ich fietsdje der al mét nao de kleutersjool!

 

Ten achtste: Ich heb ouch lang gevoetbaldj beej RKSVV, mèr door alle blessures veul ich mich noeë net as van Hanegem; De Kromme van Swartbrook!

 

Ten neugendje: Ich bin noeë schatkistbewaarder van de Spoeëkejaegers en heb langer naegel as Moosje, want de boôm is nog lang neet in zicht. Dus zoeë-as Klee al zagt: “Doot der eine von mir”!

 

Ten tieëndje: Ich bin un echte brokkemaker as ich drank op heb. Dao kan Rinus van de Tos euver mét kalle. Ich heb dao dèkker ut spoor gecontroleerdj of alle bielzen nog recht loôge.

 

Ten elfdje; Ich heb echt Spoeëkejaegers blood. Wie-j ich Jeugdprins waas in 1993 beloofdje Jan van Pietjes mich det hae adjudant zoeëj waere as ich groeëte Prins zoeëj waere. Mèr tegen veurzitter Harrie zag ich det ich det neet woeëj. Beide zeen neet oetgekome, mèr heej staon ich dan toch as eure groeëte Prins!

 

Daorom heb ich dit jubileumjaor de Orde van ut raekenmesjienke ingesteldj en gaon ich uch veur onger mien devies:

​

​

“Mét dees daag gein rapporte, mails of getalle,

Mér deze vastelaovundj gaon wae knalle!”

​

Alaaf!

​